Gen 2 | WSK | STEP | Butatala Kaem taiti, ali, se ko mel suen la bita saparam.

Genesis 2

1 Butatala Kaem taiti, ali, se ko mel suen la bita saparam. 2 Nu tom 7 ningi ura bo me beteram, nu ura nukum kaolam ale noman saparam. 3 Ale nu tom 7 mu marak tuam, ale balam tom imi kako biya mam. Mu awuk, nu mel suen biya bita saparam ale kam mu te noman saparam.

4 Imi ali se taiti Kaem Biya ^{▼▼Gen 2:4 Kaem Biya: Hebrew den te nup ilagala aniso. Nup Jahweh (JHWH) giriso aniso, se nup Kaem mu Hebrew den te ago aniso. English den te nuna iwita guruguman: LORD God.} aguwaya beteram wore ko dugu duap.

Adam Eve ilak nunga den

5 Tom Kaem Biya taiti ali beteram, mu tam sirsir mel bo me awete bagakaso, mu awuk, tuwik kapurukko Kaem me balukaso. Se kari bo ningam ura te iluwokko mu me bagakaso. 6 Yu ali ningi la aratukaso ale sor suen biya yu tuikaso. 7 Se Kaem Biya ali gege giam ale kari te nungam se aratam. ^{▼▼Gen 2:7 Hebrew den te “kari” mu “adam” masan. Ale ali ko agotala balsan “adamah” masan. Se nup “Adam” mu betela kari ko nup.} Se noko bur itugumam se kuamuru ningi namaram se kari marak ago barasam.

8 Kaem Biya ningam bo Eden beteram, koma worem bausa mu te, ale ningam mu te kari nu nungam mu ningi beteram. 9 Ale balam se tam duap duap ali mu te arataman. Tam mu yawarakala, ko nunguning kapara mu yawarakala tala. Ningam mu ko kusumuri tam bo sanamiwakaso, mu kariimet marak nungara ko tam. Se tam bo karogotala sanamiwakaso, mu kari te ikiok ale anapeya munan ningo se anapeya munan memek mu ko ikiokko.

10 Se yu bo Eden te aratukaso ale ningam owore yu tuikaso. Se yu umu palengam ale suring ilagala ilagala awuram. 11 Se yu suring bo giram mu balsan “Pishon” masan. Mu sor nup Havilah mu ningi geragoso. 12 Sor mu te ko gold yawarakala. Se ko tam bo karogotala, mu ko kiri siring yawarakala. ^{▼▼Gen 2:12 Tam kiri umutang “bdellium” masan; se manga umutang “onyx” masan.} Se ko manga bo agotala, ko ariga nikinang garagar. 13 Se yu suring 2 mu nuna balsan “Gihon” masan. Mu sor Cush mu ningi geragoso. 14 Se yu suring bo 3 mu nuna balsan “Tigris” masan. Mu sor Assyria ko koma worem bausa te mu ningi geragoso. Se yu kower bo 4 mu nuna balsan “Euphrates” masan.

15 Buta se Kaem Biya nu kari mu tam ale ningam mu ningi beteram, nu te ura to se ko sinar taukko. 16 Ale kari mu maonam, “Ni tam nunguning suen la ningam imi ningi am noko. 17 Bare ni tam bo suwanta sanamiwoso, ni te ikiko anapeya munan ningo se anapeya munan memek te ikiko, tam mu ko nunguning me noko. Ni no mu ni kuarko, nunguning.”

18 Udagi te Kaem Biya balam, “Kari kota bagurukko mu me terong. Ani ko bo, noko turantala, bitirik se ilak wete baga se sangukko.”

19 Kaem Biya ali gege tam ale buruk-kausik inanganang suen biya te beteram se aratam. Buta se inanganang buruk-kausik nunup awurokko karogo kari beteram mu kote namaram. Se kari mu mel suwan suwan nunga nunup awuram, se nunup umutang nongote anikaso. 20 Nu inanganang se buruk-kausik, wonong ko, giarum ningi ko, mu suen la nunup awu saparam.

Bare kari ^{▼▼Gen 2:20 Hebrew den te adam / Adam.} mu kumik ko bo yawara nu ilak wete bagurukko mu mena, se nu kota suwanta bagakaso. 21 Buta se Kaem Biya negeram se kari mu aniram kueram. Aniwaram se ko worogorak sokel bo kutuwuram, ale aking ko kuwim mu nungam se sisiram. 22 Asele nu kari mu ko worogorak tam mu te imet nungam. Asele imet mu tam ilak kari kote namaram tuam.

23 Se kari mu balam,

“Ese! Imet imi am ani aga turantala!
Ko sokel mu aninga sokel te aratam,
se ko kumik nunguning mu aninga angimik nunguning te aratam.
Kaem ani kari aga sail te nungam,
buta se ani aurik ‘imet’ maikko.” ^{▼▼Gen 2:23 Hebrew den te “imet” mu “ishah” masan se kari mu ko bala bo tala mu “ish”.}
24 Umutang ko kari ko nuamnuet bitiruk ale imet ilak baguruk se ilagala bagara suwanta.

Imet o kari o nungumik te guang mel mena, am nunguning la bagakasan, bare dolara me ikikasan.

25